Nappaatit tunillaassortut akiorniarlugit iliuutsit pillugit Inatsisartut peqqussutissaattut siunnersuut
pillugu
Inatsisartut Peqqinnissamut Ataatsimiititaliaata
ISUMALIUTISSIISSUTAA
Siunnersuutip aappassaaneerneqarnerani saqqummiunneqartoq
Inatsisartut ataatsimiititaliaat suliarinninnermini ukuninnga inuttaqarpoq:
Inatsisartuni ilaasortaq Anders Andreassen, Siumut, siulittaasoq
Inatsisartuni ilaasortaq Paninnguaq Olsen, Inuit Ataqatigiit, siulittaasup tullia (sinniisussaq)
Inatsisartuni ilaasortaq Lars Karl Jensen, Siumut
Inatsisartuni ilaasortaq Godmand Jensen, Atassut
Inatsisartuni ilaasortaq Loritha Henriksen, Kattusseqatigiit
Inatsisartut Peqqinnissamut Ataatsimiititaliaata UKA 2001-imi siullermeerinerup kingorna nappaatit tunillaassortut akiorniarlugit iliuutsit pillugit Inatsisartut peqqussutissaattut siunnersuut misissorpaa imalu oqaaseqarfigissallugu:
Ataatsimiititaliap iluarisimaarlugu maluginiarpaa Naalakkersuisut siunnersuummik matuminnga saqqummiussisut immikkoortumi siusinnerusukkut malittarisassaasut peqqinnissaqarfimmut oqartussaaffiup 1992-imi nunatsinnut nuunneqarnerata kingorna attatiinnarneqarsimanngimmata.
Ataatsimiititaliamit maluginiarneqarpoq siunnersuutip akuersissutigineqarneratigut tunillaassortunik nappaalanersuaqalerneratigut pilertornerusumik iliuuseqartoqarsinnaalernissaa periarfissinneqassasoq. Naallu aalajangersimasumik pisoqartillugu iliuutsit inuttaasunut ataasiakkaanut artukkersuutaasinnaagaluartut aqunneqarsinnaanngitsumik tunillaasortoqalersinnaaneranut inuit ataasiakkaat inuiaqatigiillu tamarmiusut illersorneqarnissaannut taakku pisariaqarput.
Ataatsimiititaliami amerlanerussuteqartut, tassaasut Siumup, Inuit Ataqatigiit Kattusseqatigiillu ilaasortaatitaasa, tunillaassortunik nappaalanersuaqalerneranut ataatsimiititaliarsuarmik, tunillaassortumik nappaalasoqalerneranik pasitsattoqartillugu atuutilertartussamik, pilersitsisoqarnissaa pillugu Naalakkersuisut isumaqatigaat.
Ataatsimiititaliami ikinnerussuteqartup, tassaasup Atassutip ilaasortaatitaata, amerlanerussuteqartut oqaaseqaataasa sinneri taperserpai, tassungali ilanngullugu oqaatigerusullugu Atassutip kissaatigisaa tassaammat tunillaassortumik nappaalanersuaqalernerani taamaallaat atuutinngitsumik tunillaassortunilli nappaalanersuaqalerneranut ataatsimiititaliarsuarmik upalungaarsimajuartussamik pilersitsoqarnissaa. Taamaaliornikkut tunillaassortumik nappaalanersuaqaleraluarpat piareersimasoqarluarnerusinnaavoq.
Tamanna tunngavigalugit ataatsimiititaliap isumaqatigiittup inassutigaa siunnersuut akuersissutigineqassasoq.
Taama oqaaseqarluni Inatsisartut Peqqinnissamut Ataatsimiititaliaata siunnersuut aappassaaniigassanngortippaa.
Anders Andreassen
Siulittaasoq
Paninnguaq Olsen Lars Karl Jensen
Godmand Jensen Loritha Henriksen